SEJARAH II PANGALULUION NI TUHAN JESUS TU NASIDA

PANGALULUION NI TUHAN JESUS TU NASIDA

 

Songon na tarsurat di Luk 19:10 do toho dibaen tuhan Jesus mangalului pangisi ni luat pangaribuan na lilu i na jolo, disuru ma naposoNa Tuan Pandita Van Asselt apala na parjolo mangegabati luat i.

Adong najolo saripe marga Pakpahan parripe ni marga sitompul di Pahae, dipajujujuju ma ibana marjuji; ala talu ibana, ima dalan dibahen nasida laho manggadis ibana. Ndang pola sadia lelen muse, ro ma sahalak marga sitompul sian Pahae tu Pangaribuan marjuji, talu ma i; laos i ma dalan dibahen isi ni Pangaribuan manggadis ibana 13 ringgit huhut songon na manudolhon pambahen ni marga sitompul na tu parripena marga pakpahan najolo i. 

Alani i ma umbahen borhat raja ni pahae tu pangaribuan laho pasaehon i. Laos ditingki i do ro tuan Van Asselt tu Pangaribuan. Marsipaingotan ma Tuan i huhut disi manjamita i nasida asa mananda tu Tuhan Jesus.

Alai ndang dijalo isi ni pangaribuan Barita na Uli i, gari jumonok ndang olo;ai mabiar do na jolo nasida halak na bontar, tarlobilobi angka boruboru dohot dakdanak. Hirahira taon 1863 ma i. Udut tu si ro do tuan Nommensen hirahira taon 1864 mamolus sian pangaribuan laho tu rura Silindung, diapoi tuan i ma nasida asa ditadinghon haholomon laho tu hatiuron; i pe ndang dijanghon pangisi ni luat i. Dung i muse Tuan Bets dohot Tuan Klammer, ro sia silindung mamolus Pangaribuan laho tu Angkola di taon 1866, i pe marsipaingot do di pangaribuan; alai tong do so dijalo nasida jamita ni Tuan Pandita i.

Lan dope angka Tuan Pandita naung mamolus luat i laho mangapoi nasida songon tuan Schreiber rap dohot Tuan Schiits di taon 1869; tong do laos so dijanghon nasida hata hangoluan i. Alani i do umbahen na tumading . Pangaribuan on bongot tu harajaon ni Debata sian Sipahutar dohot silindung; loja nasida, ai lomoan do rohanasida mangoloi hata ni begu (sibolis) sian Hata ni Tuhanta i.

Alai nang pe songoni, songon naung itaboto, marragamragam do dalan ni Debata laho manogunogu jolma i; ai dung ro najolo Company tu luat i. Jala dung diida nasida di luat na humaliang songon sipahutar rupani nasa naung masuk gabe Kristen, hape tartinggal ia nasida. Ima alana umbahen na balik muse, gabe nasida mangido masuk asa Kristen. Ndang olo nasida manjalo Pandita ia so Pandita na bontar ro tu nasida. Dipangido nasida do asa ro Tuan Nommensen dohot angka Pandita naung tinulak nasida hian. Ndang olo Tuan Nommensen nang kongsi na di Barmen mangoloi pangidoan i, ima alana umbahen na leleng nasida songon tandiang na hapuloan.

Di ujung na, olo ma nasid manjalo nang so pandita na bontar; laho ma nasida ( angka raja) manopot Tuan Heinstein na di Sipahutar mangido, i ma Op Balige Harianja, si salomo goarna tardidi, si Nikodemus Pakpahan rap dohot debanari dongannasida.

Dioloi Tuan Heinstein do pangidoannasida i; dilehon ma tu nasida sada guru, ima Gr Paulus Lumbantobing taon 1884. Nian naung adong do sahalak isi ni pangaribuan, si Pangkobari, si Nicodemus gorna tardidi na sai laho ganup ari Minggu tu sipahutar.

Ala soadong dope gareja gabe disopo ni Op Baliga ma jolo nasida marpungu lelengna 1 taon. Hurang do ringgas nasida na marguru i, alanii dijou Tuan Heinstein ma muse guru singkat ni Gr Paulus Lumbantobing, ima Gr Ernist Pasaribu ( na gabe pandita muse tu harianja). La humehe ma antong parpunguan i, ro ma dohot sian Pakpahan: Op. Soaduduhon ( Alexander Pakpahan goarna tardidi) dohot A. Tojal ( Adam Pakpahan goarna tardidi) dohot debanari dongannasida marguru tu Harianja, lam tu gandana ma parguru di Harianja; di pajongjong nasida ma gareja parpunguannasida.

Asa di Harianja do parjolo ojak na margoar Huria na parjolo di Pangaribuan. Alai lam leleng muse, lam tu galena do parpunguan di Harianja, gabe hurang ringkot isi ni Pakpahan laho tu Harianja, gabe dipungka nasida ma marpungu di Pakpahan dung salpu haruar minggu sian harianja di sopo ni A. Ni Parau ( si Israel Pakpahan) laos niuluhon ni guru na sian Harianja, ima parmulaan ni huria di Pakpahan taon 1886.